Ubuntu OS hmangte tana online-a file dahthatna awlsam tak mai, Ubuntu One service chu Ubuntu OS siamtu Canonical company chuan an tihtawp dawn thu an puang.
Ubuntu One hi online-a file dah thatna leh music stream theihna service tha tak mai a ni a. A thlawnin 5GB thleng file store theih niin, music dahna bika siam hi thla khata $3.99-in 20GB a lei theih a ni. Ubuntu operating system (OS) chhungah bilh tel (integrate) niin Ubuntu hmangte tan chuan file management a tinuam em em thin a ni.
Canonical chuan an tihtawp chhan chu tunlaiah online storage (cloud storage) service hrang hrang a tam tawh a. Storage space lian tak tak neiin company lian tak tak an inel nasa hle a. Hetianga nasa taka inelna karah hian Canonical chuan Ubuntu One enkawlna leh tihchangtlun zelna tur sum a nei daih tawh lo niin a sawi. A sum neihsa te hi an indin chhan ber, operating system tha leh changtlung siamna kawnga inburbun zawk an duh bawk si niin an sawi.
Ubuntu One-ah hian tunah hian a sign up theih tawh lo a. A service hi June 1, 2014 thlengin la hman theih a ni ang a. Hetih chhung hian Ubuntu One-a file kan dahte lakthlak a, hmun danga dah turin min ngen a. Ama'rawhchu, June 1 thleng hi a service chu la hman theih dawn mah se, grace period thl hnih chhung a la awm leh dawn a ni.
Ubuntu One service leina atana sum peklawk zawng zawngte pawh April 2, 2014 atanga chhiarin a la bang zawngte hi customer-te hnena peklet leh vek tura ruahman a ni.
Canonical chuan ruahmanna dang a siam leh pakhat chu he software ziahna code hi open source atan pekchhuah an tum a. He software lo ngainatu leh lo hmang tangkaitu te'n hetiang service hi an siam ve theihna tur atana ruahman a ni.
Comments
Post a Comment
Comment reng reng hi mimal mawhphurhna a ni.